Dúó Landon varð til þegar
hinn þekkti fiðlu- og bogasmiður Christophe
Landon bað þau Hlíf og Hjörleif
Valsson, sem bæði leika á fiðlur hans, að leika
44 Dúó eftir Béla Bartók inn á
geisladisk. Diskurinn var gefinn út hér á landi, en
megintilgangur Christophe var að nota hann til kynningar á hljóðfærum
sínum. Tónlistargagnrýnandi Morgunblaðsins gaf þessum disk fimm stjörnur með orðunum „Þjóðleg innlifun á heimsmælikvarða“.
Martin Frewer, sem einnig leikur á Landon fiðlu, hefur skipst á við Hjörleifi að leika í Dúóinu.
Christophe Landon býr í New York en ferðast víða um heim og meðal viðskiptavina hans eru meðlimir New York Fílharmoníunnar og Berlínarfílharmoníunnar.
Á döfinni:
Útgáfa á öllum þeim tónverkum sem vitað er að samin hafa verið fyrir tvær fiðlur hér á landi. Vorið er komiðeftir Atla Heimi Sveinsson, Tíu mínútur fyrir tvær fiðlur eftir Hildigunni Rúnarsdóttur, Furioso eftir Jónas Tómasson (hefur ekki verið flutt opinberlega), Þjóðlög í útsetningu Þorkels Sigurbjörnssonar og Dísulag III eftir Finn Torfa Stefánsson. Hlíf og Martin Frewer léku. Verkin voru tekin upp í Listasafni Sigurjóns dagana 26. og 27. ágúst 2009.
Hlíf Sigurjónsdóttir
er fædd í Kaupmannahöfn en ólst upp í Reykjavík.
Hún kom fyrst opinberlega fram 11 ára gömul er hún
lék einleik með Sinfóníuhljómsveit Íslands.
Hún nam fiðluleik hjá Birni Ólafssyni konsertmeistara
við Tónlistarskólann í Reykjavík og fór
síðar til framhaldsnáms við Háskólana
í Indiana og Toronto og Listaháskólann í Banff
og nam einnig hjá Gerald Beal fiðluleikara í New York
borg. Á námsárum sínum kynntist hún og vann með mörgum merkustu hljóðfæraleikurum tuttugustu aldarinnar, þar á meðal William Primrose, Zoltan Szekely, György Sebök, Rucciero Ricci og Igor Oistrach.
Hlíf hefur haldið fjölda einleikstónleika og leikið með sinfóníuhljómsveitum og kammersveitum víða um Evrópu, Bandaríkjunum og í Kanada. Hún hefur frumflutt mörg tónverk sem samin hafa verið sérstaklega fyrir hana.
Í ágúst 2008 kom út tvöfaldur geisladiskur með öllum partítum og sónötum fyrir einleiksfiðlu eftir J.S. Bach í leik hennar.
Martin Frewer
útskrifaðist sem stærðfræðingur frá
Oxford University en jafnhliða stærðfræðináminu
sótti hann einkatímum hjá fiðlukennaranum Yfrah
Neaman og hélt áfram fiðlunámi við Guildhall
School of Music & Drama í London hjá Yfrah Neaman. Þá
lærði hann einnig á víólu hjá Nannie
Jaimeson. Árið 1983 fluttist Martin til Íslands til að
leika með Sinfóníuhljómsveitinni hér. Um aldamótin tók hann sér leyfi í hálft þriðja ár og vann þá sem hugbúnaðarhönnuður. Núna starfar hann bæði við hugbúnaðargerð hjá hátæknifyrirtækinu Völku og sem hljóðfæraleikari.
Hann spilar með Biber tríóinu, Sardas kvartettinum, Árstíðakvartettinum, Bachsveitinni í Skálholti og ýmsum kammersveitum og hópum auk Sinfóníuhljómsveitar Íslands.
Heimasíða Martins er martin.frewer.info
Hjörleifur Valsson
lauk einleikaraprófi frá tónlistarháskólanum
í Ósló árið 1993 þar sem aðalkennari
hans var Eivind Aadland. Þá hlaut hann styrk frá tékkneska
ríkinu til náms við Prag konservatoríið. Þar
nam hann fiðluleik og kammertónlist í þrjú
ár og lék einnig með ýmsum kammerhópum og
hljómsveitum þar í borg. Hann lauk Dipl. Mus. gráðu
frá Folkwang Hochschule í Essen sumarið 2000. Á námsárum sínum í mið-evrópu sótti hann námskeið, meðal annars, hjá Grigorij Zhislin, Truls Mörk, Pierre Amoyal, Sergej Stadler, Pavel Gililov. Hann hefur komið fram á fjölda tónleika víða um Evrópu, starfað með tónlistarmönnum á borð við Mstislav Rostropovitsj, Shlomo Mintz, Gilles Apap, samið, útsett og leikið tónlist fyrir leikhús og oft tekið þátt í upptökum fyrir útvarp, sjónvarp, kvikmyndir og hljómplötuútgáfur. Hjörleifur er mjög virkur í íslensku tónlistarlífi og kemur víða við sem fiðluleikari auk þess að kenna fiðluleik við tónlistarskóla Hafnarfjarðar. Póstfang Hjörleifs er hvalsson(hjá)hvalsson.is