|
Fréttatilkynning Föstudagskvöldið
19. ágúst 2016 verður
haldin minningardagskrá um Björn Ólafsson konsertmeistara á
Halldórsstöðum og Þverá í Laxárdal í
tilefni þess að Björn hefði orðið 100 ára í
febrúar á næsta ári. Að dagskránni standa
Hlíf Sigurjónsdóttir fiðluleikari og Halldór
og Hallgrímur Valdimarssynir. Minningardagskráin hefst klukkan 19:30 í hlöðunni á Halldórsstöðum, með kaffi í boði heimamanna. Þar munu Halldórsstaðabræður og Hlíf segja frá Birni og rifja upp minningar og leiknar verða upptökur af fiðluleik hans. Síðan verður farið í slóð Björns suður í Þverárkirkju þar sem Hlíf leikur meðal annars Sónötu eftir J.S. Bach, eitt af uppáhaldsverkum Björns. | ||
 |
Björn Ólafsson konsertmeistari fæddist
26. febrúar 1917.
Hann var meðal fyrstu nemenda Tónlistarskólans í
Reykjavík og einn þeirra fjögurra sem fyrstir voru
brautskráðir úr skólanum vorið 1934. Hann
stundaði framhaldsnám í Vínarborg og lauk
prófi þar vorið 1939 með þeim árangri
að hann var strax ráðinn sem fyrsti fiðluleikari að
Vínarfílharmoníunni sem þá
var undir stjórn Wilhelm Furtwänglers. Hann kom heim til
Íslands sumarið 1939 og ætlað að standa stutt við, en
síðari heimsstyrjöldin hófst þá um haustið
og kom í veg fyrir að hann kæmist aftur til Vínar.
Björn réðst sem aðalfiðlukennari við Tónlistarskólann í Reykjavík, varð yfirkennari strengjadeildar skólans og stofnaði hljómsveit Tónlistarskólans. Þegar Sinfóníuhljómsveit Íslands var stofnuð árið 1950 varð hann fyrsti konsertmeistari hljómsveitarinnar og hélt þeirri stöðu til 1972. Árið 1942 kvæntist hann Kolbrúnu Jónasdóttur og dvöldu þau mörg sumur hjá skyldfólki Kolbrúnar á Halldórsstöðum í Laxárdal og undi Björn sér hvergi betur en þar. Björn Ólafsson var í framvarðarsveit þeirra einstaklinga sem með þrotlausri vinnu sinni og hugsjónum náðu að auðga menningarlíf vort svo að við urðum á örskömmum tíma samkeppnishæf við aðrar Evrópuþjóðir. Hann lést í Reykjavík 1984. |
|
 |
Hlíf Sigurjónsdóttir
nam fiðluleik hjá Birni Ólafssyni konsertmeistara
við Tónlistarskólann í
Reykjavík og fór til framhaldsnáms við
Háskólana í Indiana og Toronto og Listaskólann í
Banff og síðar nam hún hjá Gerald Beal fiðluleikara
í New York borg. Á námsárum sínum kynntist
hún og vann með mörgum merkustu tónlistarmönnum
tuttugustu aldarinnar.
Hlíf hefur haldið fjölda einleikstónleika og leikið með sinfóníuhljómsveitum og kammersveitum víða um Evrópu, í Bandaríkjunum og Kanada. Geisladiskar með öllum partítum og sónötum eftir J.S. Bach í flutningi hennar og diskurinn DIALOGUS, með tónverkum sem samin hafa verið sérstaklega fyrir hana, hafa hlotið frábæra erlenda dóma. Veturinn 2012–13 hélt Hlíf röð sex tónleika í kirkjum Suður-Þingeyjarsýslu til að minnast fiðlu- og tónmenningar í sýslunni í hálfa aðra öld. | |
| ||
